#DOKUMENT: Arbresh.info siguron projektligjin për ndryshim dhe plotësim të Ligjit për Zgjedhje

Mbrëmë pozita dështoi të marrë votat për votimin për procedim të përshpejtuar të Projektligjit për ndryshimin dhe plotësimin e Ligjit për Zgjedhjet e Përgjithshme në Republikën e Kosovës, i ndryshuar dhe plotësuar me Ligjin nr. 03/L-256.

Arbresh.info ka siguruar Projektligjin për ndryshimin dhe plotësimin e Ligjit për Zgjedhjet e Përgjithshme në Republikën e Kosovës, i ndryshuar dhe i plotësuar me Ligjin nr.03/L-256.

Në këtë projektligji janë bërë disa ndryshime në lidhje me votuesit jashtë vendit, konkretisht diasporën.

“Neni 6.1 i Ligjit bazik, riformulohet si në vijim:

“6.1. Çdo shtetas i Republikës së Kosovës ka të drejtë të votojë në Kosovë në ditën e zgjedhjeve, në zonën zgjedhore ku ai apo ajo është i regjistruar dhe jashtë Kosovës në Ambasada ose Konsullata të Kosovës, me kusht që emri i tij apo i saj paraqitet në Regjistrin Qendror Civil ose është regjistruar si votues i Kosovës në një datë të caktuar nga KQZ-ja”.

Ndryshime janë bërë po ashtu edhe tek neni 6 ku ka të bëjë me personat që kanë shkelje apo dënime nga gjykata, shkruan arbresh.info.

“, Neni 29 paragrafi 1, pika q) i Ligjit bazik, riformulohet si në vijim: q) i dënuar me vendim gjyqësor të formës së prerë për vepër penale me një ose më shumë vjet burgim, në tri (3) vitet e fundit;

“Në nenin 3 të ligjit bazik, është shtuar një përkufizim i ri ku thuhet se çdo shtetas i Kosovës që jeton në diasporë ka të drejtë të votojë në Ambasada dhe Konsullata të Kosovës me kusht që emri i tij apo i saj paraqitet në Regjistrin Qendror Civil ose është regjistruar si votues i Kosovës në një datë të caktuar nga KQZ-ja.

E ndërkaq në nenin 7 pas paragrafit 9 të Ligjit bazik, është shtuar një paragraf i ri.

“7.10. Periudha e regjistrimit të votuesve jashtë vendit për zgjedhje të rregullta duhet të zgjasë së paku 30 ditë. Për zgjedhjet e parakohshme, periudha e regjistrimit të votuesve jashtë vendit përcaktohet me vendim të KQZ-së, por nuk mund të jetë më e shkurtë se 15 ditë”.

E seanca e thirrur për ndryshimin e Ligjit për zgjedhje në procedurë të përshpejtuar dështoi pasi që partitë opozitare këtë gjë e panë si diçka autoritare nga ana e Kryeministrit Kurti, shkruan Arbresh.info.

Ndërkaq dje është bërë e ditur se Nasuf Bejta do të jetë kundër kandidati i Vjosa Osmanit, bënë të ditur për arbresh.info. Bejta është përfaqësues i Iniciativës së Vjosa Osmanit në listë.

Seanca për Presidentin nuk u thirr fare duke u lënë kështu për hapin e radhës ndërkaq burime të portalit Arbresh.info bëjnë të ditur se mundësit për tu thirrur kjo seancë këtë javë janë minimalizuar. /arbresh.info/